वतन हिन्द में

वतन हिन्द में विसहत्थी  ,
अमन राखियो आप. !!
सुख में जन रहवे सदा  ,
परगळ तव परताप. !!1!!

सौरभ हुवे संसार में. ,
भारत तणी ज भल्ल. !!
आप दया सूं ईसरी. ,
आवे नाम अवल्ल. !!2!!

चमन महक्के चौगुणों  ,
हद जुग में हिंदवांण. !!
वसुधा में ख्याति वधो. ,
परम्म नाम प्रमाण. !!3!!

गूंजै वातां ज्ञान री. ,
हिन्द तणीह हमेश. !!
भारत ओ हौवे भलां. ,
दुनिया चावो देश. !!4!!

ज्ञान विज्ञान'र गणित ही  ,
भौतिक साहित भल्ल. !!
सहु विद्या में हो सदा  ,
गजब हिन्द री गल्ल. !!5!!

नेक नीयत'र नेहवत  ,
सदाचार की शान. !!
सदा हुवे संसार में  ,
मेरो देश महान. !!6!!

प्रजा रेहसी प्रेम सूं. ,
द्वेष राग कर दूर. !!
जद ओ सघळा जांणजो  ,
मुलक हिन्द मशहूर  !!7!!

हिन्दु मुसलीम हेत री. ,
गजब बहावे गंग. !!
देखे उन्नति देश की. ,
दुनिया होवे दंग. !!8!!

सुक्ख अमन रे साथ में  ,
हरदम रहणो होय  !!
मिसरी दुध रे ज्युं.मिळे ,
सदा रहीजो सोय. !!9!!

राजनेता ज राज में ,
भुंडी रखै नह भ्रांत. !!
तरक्की हुय भारत तणी  ,
परम सुखी सब प्रांत. !!10!!

हिन्दु मुसलीम रा हुवै  ,
भला ज मन रा भाव. !!
करनल इण हित कारणें. ,
आप दया कर आव. !!11!!

गळी नगर हर गांव में. ,
सुखी रहे जन सोय. !!
देवी भारत देश री. ,
हरदम ख्याति होय. !!12!!
मीठा मीर डभाल