रंग रूड़ौ रजथान .
सती जती अर सुरमा सतधारण सुजान
मुधरी बोली मोवणी रंग रूड़ो रजथान
आडावल ऊभौ अडिग अड़ ऊंचो असमान
कोटि-कोटि कीरत कथन रंग रूड़ो रजथान
माही जाखम मानसी सिरे चंबल शान
नवल नीर नित नरमदा रंग रूड़ो रजथान
लाखीणी लूणी ललक जगत गंग जिमि जान
बहै बनास बड़भागिणी रंग रूड़ोै रजथान
भलौ भरीजै भाखड़ा बिसलपुर बलवान
सरवर तरवर सौवणा रंग रूड़ो रजथान
मकराणा रो मारबल राजसमद रसवान
जोधाणै छीतर जबर रंग रूड़ो रजथान
खैर कैर अर खेजड़ा बोरां करूं बखान
पीलू ढालू पाँगरै रंग रूड़ो रजथान
चंग भपंग कमायचा ताल मजीरा तान
मोरचंग मनभावणी रंग रूड़ो रजथान
भाटै भाटै भोमिया थळवट्ट थपिया थान ़
जग चावा झूंझार जी रंग रूड़ौ रजथान
सदा सवाया सौवणा करी ऊँट कैकांण
गाय दुवाड़ै गौरकी रंग रूड़ौ रजथान
चिड़ी कमेड़ी आ चुगै धरमादै रो धान
मोेर पपीहा मोकळा रंग रूड़ौ रजथान
पैरण धोती पागड़ी अँगरखी अचकान
मौत्यां मूंघी मोजड़ी रंग रूड़ौ रजथान
महल अटारी माळिया छायां छप्पर छान
पड़वां पाळी प्रीतड़ी रंग रूड़ौ रजथान
तेज धार तलवार है मखमल रो है म्यान
भाला ढालां भळकतां रंग रूड़ौ रजथान
आखै भारत आखतां नर निपजै निरवाण
ठावी अर चावी ठसक रंग रूड़ौ रजथान
@©© रतन सिंह चाँपावत रणसी गांव कृत
कोई टिप्पणी नहीं:
एक टिप्पणी भेजें